Вице-министр дизель отыны тапшылығының себептерін айтты

23 Июня 2021 1026 Экономика, Транспорт

Фото:Хабар 24

Алматы. 23 маусым - Ақпараттар орталығы - Қазақстанның оңтүстік өңірлерінде дизель отыны мен бензин тапшылығы жақын арада жойылады. Бұл туралы брифингте энергетика вице-министрі Әсет Мағауов мәлім етті, деп хабарлайды Хабар 24.

Мағауов елдің оңтүстігіндегі мұнай өнімдерін жеткізудегі қиындықтардың негізгі себептері бірнеше факторға байланысты екенін айтты деп хабарлайды Tengrinews.kz. «Мысалы, Шымкент мұнай өңдеу зауыты (МӨЗ) жөндеу жұмыстарына байланысты жұмысын тоқтатты. Сондай-ақ, ол іске қосылғанға дейін 5-6 күн бұрын Түркістан, Қызылорда және Жамбыл облыстарында орналасқан жанармай құю бекеттерінің иесі Атырау мұнай өңдеу зауыты мен Павлодар мұнай-химия зауытына өтінім беруді қысқартты. Себебі теміржол тарифтері қымбаттап кетті. Кәсіпкерлер Шымкент МӨЗ іске қосылады деп күткен», – деді вице-министр.

Ол 13 маусымнан бастап бензин өндірісі қайта басталғанын айтты. Соңғы бес күнде орташа тәуліктік өндіріс 6,5 мың тонна болған. Бұл ретте оңтүстік өңірлерде АИ-92 бензинін тәуліктік тұтыну мөлшері - 5,3 мың тонна. 16 маусымнан бастап дизель отынын өндіру қайта жанданған. Соңғы төрт күнде орташа тәуліктік өндіріс алты мың тоннаны, ал күнделікті тұтыну 5,6 мың тонна болған.

«Мұнай өнімдерін өндіру ағымдағы қажеттілікті толығымен өтейді. Шымкент МӨЗ-інде жөндеу жұмыстары кезінде кәсіпкерлер Атырау және Павлодар МӨЗ-дерінен отын сатып алу мүмкіндігіне ие болды. Өңірде мұнай өнімдерінің қоры қалыптасты. Бұл стандартты тәжірибе, зауыттар жыл сайын жоспарлы жөндеуден өтеді. Бірақ жанар-жағармайды теміржол көлігімен уақтылы жөнелту бойынша мәселелер болды. Қазір ҚТЖ-мен бірлесіп, оңтүстік өңірлерге басымдықпен бензин жөнелтуді жеделдетіп жатырмыз. Министрлік мұнай өнімдерін өндіру саласындағы үйлестіруді қамтамасыз етеді, ал одан кейінгі процестер - кәсіпкерлер арасындағы қарым-қатынасқа байланысты. Осыған қарамастан, жеткізілім іркілістерін азайту үшін біз оңтүстік өңірлерге отынды қолмен жеткізуді қамтамасыз ету бойынша жұмыстарды жүргізіп жатырмыз», – деп сендірді Әсет Мағауов.

Источник: Хабар 24

читайте также