Спортта қазақстандық әскерилер британдықтар мен америкалықтардан басым түсті

20 Апреля 2016 1869 Спорт, қазақтар, әскерилер, британдықтар, америкалықтар

Алматы. 20 сәуір. Ақпараттар орталығы. Қазақстандық әскери қызметшілер «Дала қыраны-2016» оқу-жаттығуындағы спорттық сайыстарда үздік атанды, деп хабарлады ҚР Қорғаныс министрлігінің баспасөз қзыметі.

Хабарланғандай, «Іле» оқу-жаттығу полигонының базасында «Дала қыраны-2016» тактикалық-арнайы бітімгершілік оқу-жаттығуының алғашқы кезеңі шеңберінде армрестлинг, арқан тарту, волейбол және 4х400 метрлік эстафета бойынша спорттық іс-шаралар өтті.

Спорттық жарысқа Қазақстан, Америка Құрама Штаттары мен Ұлыбритания Қарулы Күштерінің 78-ден аса өкілі қатысты.

«Оқу-жаттығу кезінде қазақстандық әскери қызметшілер атқарып отырған жұмысында қаншалықты кәсіби екенін көрдім. Далалық жағдайларда оқу-жаттығуға қатысушылар арасында ешқандай айырмашылық байқалған емес, тілдік ерекшеліктерімізге қарамастан, барлығымыз бір команда сияқты жұмыс жасадық», - деп АҚШ ҚК-нің әскери қызметшісі Дэвид Далтон атап өтті.

Спорттық сайыстардың қорытындысы бойынша Қазақстанның әскери қызметшілері үздік атанды, ІІ орынды Ұлыбританияның әскерилері, ІІІ орынды Америка Құрама Штаттары иеленді.

«Мен Қазақстанда бірінші рет болып тұрмын және елдеріңіздің Қарулы Күштерінің әскери қызметшілерімен алғаш рет өзара әрекет жасап жатырмын. Мен қазақстандық әріптестерімнің дене даярлығына таң қалып отырмын. Олар дода барысында бізден асып түсті және жалпы командалық есепте еңбектеріне лайықты бірінші орынды қанжығалады», - деді Ұлыбритания әуе әскерлерінің бірінші батальон сержанты Уилльям Томас.

Аталып өткендей, Қазақстанда «Дала қыраны-2016» тактикалық-арнайы бітімгершілік оқу-жаттығуының алғашқы кезеңі өтіп жатқанын айта кетейік. Іс-шараға Америка Құрама Штаттары мен Ұлыбритания Қарулы Күштерінің 60-тан аса өкілі қатысады. «Дала қыраны-2016» бітімгершілік оқу-жаттығуының екінші кезеңін Ұлыбританияның аумағында өткізу жоспарлануда. Онда қазақстандық «Қазбат» бітімгершілік батальонының 250-дей әскери қызметшісі аттанады. Жеке құрам мен қару-жарақты жөнелту үшін ҚР Қарулы Күштерінің әскери-көліктік авиациясы тартылатын болады.