Қорғаныс министрлігі: Моральдық-психологиялық тұрғыдан даярланған 7 жігіттің ішінен тек біреуі ғана әскерге шақырылады

27 Марта 2015 1178

Ағымдағы жылдың 1 сәуірінен бастап Қазақстанның барлық өңірінде әскерге шықыру медициналық комиссиясы жұмысын бастайды, деп хабарлайды ҚР Қорғаныс министрлігі.

Бүгінгі таңда Қазақстан Республикасының заңнамасына сәйкес әскери қызмет мерзімі бір жыл болып айқындалды.

«Қазақстан әскері аралас тәсілмен мерзімді және келісімшарт бойынша әскерге шақырылу арқылы жасақталады. Әскери қызметтің барлық салаларында әлемдік тәжірибеге негізделген жаңа әрі озық өзгерістер енгізілуде. Осындай өзгерістердің бірі жеке құрамды жасақтау және әскерге шақыру мәселелерін тыс қалдырмады. «Әскери қызмет және әскери қызметшілердің мәртебесі туралы» ҚР Заңына сәйкес мерзімді әскери қызметке шақыру жылына екі рет жүргізіледі», — дейді ҚР ҚК БШ Ұйымдастыру-жұмылдыру жұмыстары департаменті бастығының орынбасары полковник Амантай Өсербаев.

Қорғаныс министрлігінің мәліметінше, республикадағы әскерге шақыру резервінің жеткілікті болуы жас буынды анағұрлым сапалы іріктеуге мүмкіндік береді, іс жүзінде медициналық комиссияға келген дені сау, моральдық-психологиялық тұрғыдан даярланған 6-7 жігіттің ішінен тек біреуі ғана әскерге шақырылады.

Жергілікті әскери басқару органдары мерзімді әскери қызметке шақыруға жататын азаматтарды жүйелі түрде зерделеу жұмыстарын жүргізеді.

Әскерге шақырылушының өзімен, оның ата-анасымен немесе ол тәрбиелеуінде болып табылатын азаматтармен, сондай-ақ әскерге шақырылушы жұмыс істейтін кәсіпорынның немесе оқитын оқу орнының өкілдерімен жеке әңгімелеседі. Олардың денсаулық жағдайына, білім деңгейіне, моральдық-психологиялық жай-күйіне және отбасы жағдайына ерекше көңіл аударылады.

Бүгінгі әскерге шақырылушы наркотестілеуден өтеді, гепатитті, туберкулезді анықтау жөніндегі міндетті зертханалық тексеру бойынша талаптардың шеңбері кеңейтілген, сондай-ақ аурудың себептерін анықтау мәселелері қайта қаралған.