Қазақстанның ТИФА елдерімен сыртқы сауда айналымы $5,3 млрд құрады.

05 Апреля 2016 1819 Қазақстан, АҚШ, ОртаАзия, саудаайналымы

Алматы. 5 сәуір. Ақпараттар орталығы. Бішкек қаласында (Қырғызстан) АҚШ пен Орталық Азия елдері арасындағы Сауда және инвестициялар бойынша негіздемелік келісім бойынша кеңес (ТИФА) мәжілісі өтті, деп хабарлады ҚР Ұлттық экономика министрлігінің баспасөз қызметінен.

Хабарда айтылғандай, мәжіліс шеңберінде қатысушылар АҚШ пен Орталық Азия елдері арасындағы сауда-экономикалық, инвестициялық ынтымақтастық, сонымен қатар өңірлік интеграцияны нығайту болашағын талқылады.

«ТИФА кеңесі АҚШ пен Орталық Азия елдері арасындағы сауда-экономикалық ынтымақтастықтың тәсілдерін әзірлеу мен стратегиялық маңызды салаларын одан әрі жүзеге асыру бойынша диалогтың маңызды бөлігі екен», - деп мәлімдеді қазақстандық делегацияны бастап барған ҚР ұлттық экономика министрінің орынбасары Қайырбек Өскенбаев,

Ол Қазақстанның өңірлік ынтымақтастық мәселелеріне ерекше назар аударатындығын баса айтты. Заманауи халықаралық үрдістерді дамыту жағдайында Республика отандық экономиканы жаһандық және өңірлік жүйеге интеграциялауға мүдделі. Вице-миистрдің ойы бойынша, Орталық Азия мемлекеттері «жаһандық және өңірлік саясат пен экономиканың маңызды мәселелерін талқылау үшін диалогтық алаң құруына болады».

«Біздің көзқарасымыз бойынша ТИФА кеңесінің мәжілісі экономика саласындағы перспективті жобаларды ілгерілету және күрделі мәселелерді шешудің тиімді тетігі болады», - деп мәлімдеді Қ. Өскенбаев.

Ол ТИФА-ны нақты бірлескен жобаларды жүзеге асыру арқылы тәжірибелік мазмұнмен толтыру; бірыңғай ұстанымды әзірлеу кезінде қатысушылар арасында үйлестіруді қамтамасыз ету үшін «Focal point» пен «Follow up», сондай-ақ, ТИФА-ның министрлік мәжілістерінің қорытындылары бойынша уағдаластықтарды жүзеге асыру тетіктерін енгізу; ТИФА шеңберінде өңірдегі іскер топтар интеграциясын ынталандыру үшін орта топтың үлкен және белсенді бөлігі болып табылатын ірі ұлттық компаниялар, кіші және орта бизнес өкілдерінің қатысуымен инвестициялық форумдар ұйымдастыру тәжірибесін жүргізуді ұсынды.

Хабарда айтылғандай, Қазақстанның ТИФА елдерімен 2015 жылғы сыртқы сауда айналымының көлемі $ 5 317,37 млн. құрады.

Сауда және инвестициялар бойынша негіздемелік келісім (ТИФА) 2004 жылы Вашингтон қаласында АҚШ, Қазақстан, Өзбекстан, Қырғызстан, Тәжікстан және Түркіменстан араларында қол қойылды. Келісім халықаралық сауданы ұлғайту мен шетелдік инвестицияларды тарту, сондай-ақ, өңірлік тұрақтылық пен қауіпсіздікті нығайтуға ықпал ететін аймақ елдері мен Ауғанстан арасындағы сауда қатынасты жақсарту бойынша шараларды қамтиды.