Маңғыстауда жолаушылар пойызы газ тасымалдаушымен соқтығысты

29 Января 2016 1548 Маңғыстау, Пойыз, Соқтығыс

Алматы. 29 қаңтар. Ақпараттар орталығы. Маңғышлақ-Бейнеу учаскесінің өткелінде автокөлік жүргізушісінің кінәсінен жолаушылар пойызы соқтығысты, деп хабарлады «ҚТЖ» ҰК» АҚ баспасөз қызметінен.

Хабарда айтылғандай, 28 қаңтарда сағат 16.30-да Маңғышлақ-Бейнеу учаскесінің №6 разъезі ауданында орналасқан өткелде «Маңғышлақ-Алматы» бағытындағы №377 жолаушылар пойызы автокөлік жүргізушісінің кінәсінен соқтығысты.
Машинсттің айтуынша, автокөлік өткел алдында тұрған. Сосын көлік жүргізушісі пойызға жақын жерде күтпеген жерден жылдамдықты қосып жіберген. Сағатына 50 шақырымдық жылдамдықпен келе жатқан пойызды тоқтату үшін машинист шұғыл тежегішті басқанымен, бірақ ара қашықтық тым қысқа болғандықтан соқтығысуды болдырмау мүмкін емес еді.
Хабарда түсіндірілгендей, газ цистернасын алып бара жатқан автокөлік «ҚарақұдықМұнайГаз» АҚ-ға тиесілі.
Оқиға салдарынан локомотивтің бірінші секциясы зақымданған. Автокөлік жүргізушісі мен машинистің көмекшісі зардап шеккен.
Хабарда айтылғандай, өткелдегі дабыл беру құралы жұмыс жасап тұрған. Өрт орын алмаған, қаза тапқандар да жоқ.
Соқтығысу салдарын жою бойынша жұмысты тексеру және ұйымдастыру үшін оқиға орнына Маңғыстау жол бөлімшесі кәсіпорынының басшылары шығып кеткен.
Сонымен қатар, баспасөз қызметі хабарлағандай, Маңғыстау локомотив пайдалану депосының машинисі Арап Ағатаев майысқан локомотив кабинасынан шығып, тепловоздың секциясын ажыратып, екінші секциясымен жолаушылар пойызын қауіпсіз жерге жеткізген.
«Мен сол сәтте тек өзім алып келе жатқан жолаушылардың қауіпсіздігін ойладым. Басқа ештеме ойыма келмеді. Ол мен үшін ең бастысы болды» — деді машинист.
«Мен өзім жеке құрамды аралып шығып, 287 жолаушының ешқайсысының зардап шекпегеніне көз жеткіздім. Жол серіктер жолаушыларды жолдағы жағдай туралы әркез хабардар етіп отырады, қажеттіліктерін сұрайды, мейрамхана-вагоны да жұмыс жасайды», — деді пойыз бастығы Бибіажар Құлыбаева.
Хабарда айтылғандай, локомотив ауыстырылғаннан және қозғалыс қалпына келтірілгеннен кейін сапарларын жалғастырды.