Достық станциясында теміржолшыларға 10 жаңа үй салынды

05 Мая 2016 2928 ҚТЖ, станция, үй, пайдалану

Алматы. 5 мамыр. Ақпараттар орталығы. Шекаралық Достық станциясында теміржолшыларға арналған 10 жаңа үй салынды, деп хабарлады «ҚТЖ» ҰК» АҚ баспасөз қызметінен.

Хабарда айтылғандай, Шекаралық Достық станциясында теміржолшыларға арналған жалпы көлемі 13 мың шаршы метрлік, 10 екі қабатты жаңа үйлер пайдалануға берілді. Үйлер қазіргі заманғы жаңа жобалар негізінде бой көтерді. 136 пәтердің барлығының жалпы аумағы 95 шаршы метрлік үш бөлмелі, кең әрі жарық.

«Жаңа пәтерлерге станция, жол дистанциясы, белгі беру және байланыс, электрмен қамту дистанциялары мен «Қазақстан темір жолы» ҰК» АҚ-ның басқа да құрылымдық бөлімшелерінің еңбеккерлері қамтылған», - делінген хабарда.

Хабарда атап өткендей, олар алдымен темір жол саласында ұзақ жылдары еңбек еткендер мен көп балалы отбастарына басымдық берді.
«Достық станциясы жыл санап қарқынды дамып келеді. Мұнда жас мамандар көптеп келуде. Ағымдағы жағдайға қарамастан, компания өз қызметкерлерінің жайлылығы үшін барлық жағдайларды қарастыруда», - деді Алматы жол бөлімшесінің директоры Съезбек Алишев.

Баспасөз қызметінде еске салғандай, Достық станциясында пойыздарды қабылдау мен жөнелтудің кешенді үдерісі, оның ішінде Қазақстанның мемлекеттік шекарасы арқылы келген жүк және жолаушылар пойыздарының вагондарындағы жүктерді түсіру, тиеу, жолтабандарын ауыстыру, жаңа жылжымалы құрамдарды жасақтау және одан әрі басқа да көршілес елдерге жіберу қызметтерін де атқарады.

Достық станциясы Қазақстан мен Қытай мемлекеттік шекарасындағы теміржол бекеті болып саналады. Станцияда тұратын ондаған мың тұрғындардың негізгі бөлігін теміржолшылар құрайды.