Аукционға моноқалалардың жанындағы аз зерттелген жер қойнаулары учаскелері шығарылуда

20 Апреля 2016 1832 Аукцион, жерқойнаулары, сату,

Алматы. 20 сәуір. Ақпараттар орталығы. Аудандардағы жұмыс орындарын сақтап қалу және жаңасын ашу үшін аукционға моноқалалардың жанындағы аз зерттелген жер қойнаулары учаскелері шығарылуда, деп хабарлады ҚР Инвестициялар және даму министрі Әсет Исекешев Астанадағы тау-кен өнеркәсібі форумында.

«Аукционға аз зерттелген, қосымша барлау жұмыстарын қажет ететін, мноқалалардың жанында ресурстық базасы жабдықталған және аймақта жаңа жұмыс орындарын ашуға және сақтап қалуға мүмкіндік беретін жер қойнауы учаскелері шығарылуда», - деді Ә. Исекешев.

Ол хабарлағандай, 2015 жылдың желтоқсанындағы аукционда 36 лот бойынша бюджетке 1,5 млрд теңгеден астам қаржы қол қойылған бонус ретінде тартылды.

«Аукцион байқаудың барынша ашық және таза үлгісі болып табылады, онда шешім жария түрде хабарланады. Жалпы, аукцион туралы инвесторлардан ашықтығы, қолжетімділігі бойынша жақсы пікірлер келіп түсті», - деп атап өтті министр.

Сонымен, пилоттық режимде Степногорск моноқаласы маңындағы 100 км аймақ таңдалып алынды, ағымдағы жылдың бірінші тоқсанында 25 блок бойынша 10 жаңа келісімшарт жасалды.

«Соңғы үш жылда көп нәрсе жасалды, реформалардың алғашқы кезеңі аяқталғаны туралы айтуға болады. Мысалы, геологиялық ақпаратты ұсыну мерзімі 240 күннен 1 күнге дейін қысқарды. Заңнамалық базаға, атап айтқанда жер қойнауын барлау бойынша австралиялық үлгіде өзгерістер енгізілді. Барлау бойынша келісім шарт жасау мерзімі екі жылдан 25 күнге дейін қысқарды», - деді Ә. Исекешев.

Оның есептеуінше, мұндай шаралар барлау саласына жаңадан ашылған шағын және орта кәсіпорындарды тартуға мүмкіндік береді. Олар өз кезегінде тәжірибе көрсетіп отырғандай 50%-ға дейін жаңа кенорындарын ашуда.