Асфендияров ат. қазақ медуниверситеті шетелдіктердің басқаруына беріледі

18 Февраля 2016 1531 Басқару, Медуниверситет, Шетелдіктер

Алматы. 18 ақпан. Ақпараттар орталығы. Қазақстандық медициналық ЖОО-да мамандарды үздік шетелдік медициналық мектептермен бірлесе отырып дайындайтын болады, деп мәлімдеді бүгін ҚР Денсаулық сақтау және әлеуметтік даму министрлігінің кеңейтілген алқа отырысында министрлік басшысы Тамара Дүйсенова.
«Медициналық білім беруді жетілдіру үздік шетелдік медициналық стандарттарды трансферттеу негізінде іске асырылатын болады. Осы мақсатта қазақстандық медициналық ЖОО мен шетелдік медициналық мектептер арасында тығыз байланыс ұйымдастырылады», — деді Т. Дүйсенова.
Министр отандық медициналық ЖОО-дың ықтимал стратегиялық әріптестері ретінде АҚШ, Ұлыбритания, Германия, Оңтүстік Корея, Финляндия және т.б. елдердің медициналық мектептері қарастырылатынын мәлімдеді.
Үздік шетелдік ЖОО қатарынан стратегиялық әріптесі анықталатын алғашқы отандық ЖОО — С.Д. Асфендияров атындағы Қазақ ұлттық медициналық университеті болмақ. Бастапқы кезеңде-ақ ҚазҰМУ басқару шетелдік әріптестермен бірге жүзеге асырылатын болады, одан кейін кезең-кезеңімен университетті сенімгер басқару түріне беріледі.
Хабарда айтылғандай, медициналық білім беруді жетілдіру шеңберінде талапкерлерді арнайы тест көмегімен таңдау тәсілдері жаңғыртылып, дәрігерлер мен резиденттерді базалық дайындаудың жаңа білім беру бағдарламалары енгізіледі. Сонымен қатар, профессорлық-оқытушылық құрамның әлеуеті арттырылып, білім беру, ғылыми қызмет және медицинаның практикасы процестерін біріктіретін университеттік емханалар құрылады.