АҚШ Қазақстан Қарулы Күштерін кәсібилендіруге көмектеседі

04 Февраля 2016 1634 АҚШ, Ынтымақтастық, Қазақстан, ҚарулыКүштер

Алматы. 4 ақпан. Ақпараттар орталығы. Қазақстан мен АҚШ Қарулы Күштері әскери ынтымақтастығының жобасы әзірленді, деп хабарлады ҚР қорғаныс министрігінің баспасөз қызметінен.

Хабарда айтылғандай, Астанада өткен үйлестіруші офицерлердің жұмыс тобының үш күндік отырысы барысында 2016-2017 жылдарға арналған ҚР мен АҚШ ҚК әскери ынтымақтастығы жоспарының жобасы әзірленді.
«Жақын арадағы екі жылда әскери салада қазақстандық-американдық өзара қарым-қатынастың дамуының негізгі бағыттары бойынша бітімгершілік қызмет, Қарулы Күштерді кәсібилендіруде көмек көрсету, сондай-ақ әскери білім беру болмақ», — делінген хабарда.
Хабарда түсіндірілгендей, Қазақстанның оқу орындарында оқыту әдістемелерін жетілдіру, сержанттар корпусын дамытуға жәрдем беру жоспарлануда. Сонымен бірге, тілдік оқыту бойынша жұмыс өз жалғасын табады. Болашақ жоспарда Қазақстан мен АҚШ әскери оқу орындарының курсанттарымен алмасу да бар.
Хабарда айтылғандай, осы жылы екі елдің әскери байланысы шеңберінде алғашқы бірлескен іс-шара өткенін айта кеткен жөн. Тұңғыш рет ҚР Қорғаныс министрлігінің Кадет корпусында кадеттерді оқыту әдіснамасын жетілдіру мәселелері жөнінде семинар өтті. АҚШ ҚК Құрлық әскерлерінің сержант-майорлары академиясының нұсқаушы сержанттары оқытушылар және сержанттар құрамымен сабақтар өткізді. Кадет корпусының 25-ке жуық оқытушысы мен сержанты семинарда сабақтарға дайындалу, топта жұмыс жасау, жоспар-конспектілерді әзірлеу, өзіндік жұмысты ұйымдастыру және үйренушілерді бағалау әдістемесін пысықтады.